Zbardhen detaje të aksionit për arrestimin e Ergys Agasit, i akuzuar nga SPAK si kreu i një grupi kriminal që vepronte brenda Agjencisë Kombëtare të Shoqërisë së Informacionit. Në dosjen e SPAK thuhet se orët e fundit para se të arrestohej janë monitoruar me dron të gjitha lëvizjet e Agasit nga Durrësi drejt Elbasanit dhe, teksa kthehej në qytetin bregdetar, u vu në pranga.
Sipas dosjes, Agasi rezulton se doli nga kompleksi në pronësi të Ervis Docit, i njohur si Visi i Pojës, person në kërkim ndërkombëtar për trafik kokaine e grup kriminal, dhe prej andej shkoi tek Tregu Agroushqimor në Elbasan, në pronësi të babait të Suel Celës.
Të gjitha lëvizjet e orëve të fundit janë filmuar dhe janë pjesë e dosjes.
Veprimet hetimore
“Gjatë kryerjes së veprimeve operative, zona është monitoruar nëpërmjet përdorimit të mjetit fluturues pa pilot (dron), me qëllim evidentimin dhe lokalizimin e shtetasit në kërkim”, thekson vendimi.
Konkretisht:
Ora 11:39: Konstatohet duke dalë nga ambientet e katit të dytë të kompleksit të vilave një person, në dukje i dyshuar si Ergys Agasi, i veshur me bluzë të bardhë dhe pantallona treçerekëshe ngjyrë të zezë, i cili del nga ambientet, vazhdon në drejtim të hollit në katin e parë të kompleksit dhe futet në ambientet e brendshme të kompleksit.
(Kompleksi rezulton në pronësi të Ervis Docit, i njohur si Visi i Pojës, person në kërkim ndërkombëtar për trafik kokaine e grup kriminal).
Doci njihet si një nga lidhjet më të forta të Ergys Agasit.
Më tej rezulton se:
Ora 11:59: Gjatë monitorimit u konstatua një automjet i tipit Audi A6, me portobagazh, ngjyrë e zezë, duke hyrë në ambientet e kompleksit, ku, pasi hyn në portën kryesore të kompleksit, vazhdon drejt parkimit nëntokësor të kompleksit të vilave, ku, për shkak të xhamave të errësuar të automjetit, nuk e patëm të mundur identifikimin nga ana jonë të personave që mund të ndodheshin në automjet.
Ora 12:02: Në vijim të vëzhgimit të zonës me mjetin (dron), u konstatua duke dalë nga parkimi nëntokësor i kompleksit të vilave automjeti i tipit Audi A6, me portobagazh, ngjyrë e zezë, ku, në sediljen e përparme, në krah të drejtuesit të mjetit, u vërejt një person i veshur me bluzë të bardhë, i cili, nga të dhënat e disponuara dhe rrethanat e konstatuara, dyshohej të ishte shtetasi Ergys Agasi (person në kërkim), i ulur pasagjer në sediljen e përparme të automjetit. Pas komunikimit me oficerin, automjeti Audi A6, me portobagazh, u mbajt në vëzhgim nga ana jonë dhe u ndoq për vijimin e veprimeve të mëtejshme.
Ora 12:03: Automjeti Audi A6, me portobagazh, ngjyrë e zezë, me targa AB323JK, i cili vazhdon itinerarin e lëvizjes pa ndërprerje nga kompleksi i vilave, në drejtim të Nishtullës, rrethrrotullimit të Shkozetit, drejtim Plepave, ku futet nëpër rrugët në afërsi të shinave të trenit, që të nxjerrin në rrugën e Plazhit, Durrës, ku, pasi arrin në zonën e Plepave, vazhdon drejtimin drejt autostradës, në drejtim të Kavajës, Rrogozhinës, në drejtim të Peqinit, Elbasanit.
Ora 13:35: Automjeti Audi A6, me portobagazh, me targa AB323JK, pasi bën rrethrrotullimin e Bradasheshit, vazhdon në drejtim të rrugës “Kadri Hoxha”, ku, në afërsi të Tregut Agroushqimor (në pronësi të babait të Suel Celës, që është në kërkim ndërkombëtar nga SPAK si kreu i një grupi kriminal), kthehet në rrugicën djathtas, ku, pas komunikimit me oficerin, automjeti Audi, me targa AB323JK, nuk u mbajt në vëzhgim nga ana jonë. Pas komunikimit me oficerin, grupet e vëzhgimit u vendosën në afërsi të rrethrrotullimit të Bradasheshit.
Ora 18:16: Konstatohet duke dalë nga rruga “Kadri Hoxha” automjeti i tipit Audi A6, me targa AB323JK, i cili vazhdon drejtimin e lëvizjes pa ndërprerje nga rrethi i Bradasheshit, autostradë, në drejtim të Peqinit, Rrogozhinës, Kavajës, ku, në afërsi të zonës së Plepave, në bashkëpunim dhe koordinim me shërbimet e tjera me uniformë të Drejtorisë Vendore Durrës, u bë i mundur ndalimi i automjetit të mbajtur në vëzhgim, ku, pas ndalimit të automjetit Audi A6, ngjyrë e zezë, me targa AB323JK, rezultoi shtetasi Ergys Agasi (person në kërkim), i ulur në sediljen e përparme, dhe drejtues automjeti një person, i cili, pas verifikimit, rezultoi të ishte shtetasi Uljan Shpataraku.
Ergys Agasi u prangos bashkë me Shpatarakun tek zona e Plepave në Durrës.
