Kreu i PD, Sali Berisha, ka ngritur akuza të reja për marrëdhëniet mes kompanisë shtetërore KAYO dhe bizneseve të lidhura me Ron Yeffet, duke pretenduar se përmes tyre janë përfituar rreth 45 milionë euro nga fondet publike.
Sipas Berishës, dokumentet që disponon PD tregojnë se TIMAK, ku Yeffet është aksioner, nuk plotësonte kriteret për të hyrë në partneritet me KAYO-n në industrinë e mbrojtjes. Ai akuzoi kryeministrin Edi Rama se ka mbështetur përmes ligjeve dhe vendimeve atë që e cilësoi si një “skemë mafioze”, pretendime që mbeten për t’u provuar nga organet e drejtësisë.
Berisha ngriti gjithashtu akuza se Yeffet dhe ortakët e tij kanë blerë armë në vende të treta për t’i paraqitur më pas si prodhime shqiptare. Kreu i PD-së tha se dokumentet dhe informacionet e mbledhura nga opozita do t’i dorëzohen SPAK-ut, por edhe institucioneve të NATO-s dhe ministrive të Mbrojtjes të vendeve anëtare.
TIMAK Defence është një sipërmarrje e përbashkët ku TIMAK zotëron 80% të aksioneve dhe kompania shtetërore KAYO 20%. Ron Yeffet zotëron 49% të TIMAK, ndërsa 51% janë në pronësi të Arjeta Pucës.
Emri i Yeffet është vendosur së fundmi në qendër të hetimeve pas publikimit të audiopërgjimeve ku ngrihen dyshime për tregti armësh. SPAK ka nisur verifikimet dhe ka ushtruar kontrolle në banesën e Yeffet, ndërsa janë sekuestruar edhe materiale në kuadër të hetimit.
Në të njëjtën dalje, Berisha u ndal edhe te reforma territoriale, duke kundërshtuar shkrirjen e 15 bashkive dhe duke u bërë thirrje qytetarëve që t’i bashkohen protestës së paralajmëruar gjatë seancës së nesërme në Kuvend.
