Institucioni i Avokatit të Popullit ka nisur sot një grup pune drejt burgut të Pojskës për të verifikuar nga afër situatën e një gruaje të dënuar, e cila është njëherësh edhe nënë e një foshnjeje vetëm 4-muajshe.
Verifikimi në terren po kryhet nga struktura e specializuar e këtij institucioni, Mekanizmi Kombëtar për Parandalimin e Torturës (MKPT).
Përmes një njoftimi zyrtar, bëhet me dije se ekspertët e grupit të punës do të këqyrin kushtet e qëndrimit dhe respektimin e të drejtave të nënës dhe foshnjës në mjediset e vuajtjes së dënimit.
"Sot, një grup pune i Institucionit të Avokatit të Popullit, konkretisht Mekanizmi për Parandalimin e Torturës, po shkon në burgun e Pojskës, për të verifikuar situatën lidhur me dënimin e një zonje, që është njëherësh edhe nënë e një foshnje 4-muajshe," njofton Avokati i Popullit.
Institucioni ka bërë të ditur se gjetjet dhe konkluzionet e këtij monitorimi në terren do të bëhen publike menjëherë pas përfundimit të verifikimeve.
