Ndonëse procesi i numërimit të votave ka përfunduar, “lufta” për mandatin e Tiranës ende vazhdon mes ish-bashkëpunëtorëve të dikurshëm Sali Berishës dhe Agron Shehajt.
Kreu i Partisë Mundësia ka reaguar pas deklaratës së PD se do të kërkojë rinumërim të votave të pavlefshme në Tiranë me qëllim marrjen e mandatit të 14, duke i hequr kështu Mundësisë mandatin e dytë.
Me anë të një postimi në rrjetet sociale, Shehaj flet për një skenar të grabitjes së një mandati të Partisë Mundësia, por thekson se kjo nuk ka për të ndodhur.
Sipas tij kjo është përpjekje e dëshpëruar nga partitë e vjetra që nuk duan të ndryshojnë.
“Dy mandate. Dy votëbesime. Të ndershme. Të padiskutueshme. Dhe askush nuk do t’i rrëmbejë. Askush. Ajo që po përpiqen të bëjnë është një grabitje. Një tjetër përpjekje e dëshpëruar nga partitë e vjetra që nuk duan të ndryshojnë. Nuk mund të bërtasësh për farsë zgjedhore, dhe pastaj të vjedhësh një mandat në tavolinë. Kjo është hipokrizi. Dhe nuk do të ndodhë! E kemi thënë më parë dhe po e themi sërish: votat tuaja nuk preken. Çdo votë për Partinë Mundësia është një votë për ndryshimin, dhe nuk do të preket, nuk do të tjetërsohet, nuk do të vidhet” – shkruan Shehaj.
"Akti i dytë" i përplasjes mes Berishës dhe Shehajt mesa duket do të vazhdojë edhe pas zgjedhjeve. Kujtojmë se përplasja mes tyre ka nisur gjatë fushatës zgjedhore, kur kreu i PD akuzoi se kryetari i partisë Mundësia po keqpërdorte databazën e demokratëve për interesin e partisë së tij. Ndërsa Shehaj shprehej se databazën ia kishte dhënë ai Berishës, kur ky i fundit filloi foltoren.
Megjithatë përplasja e radhës për mandatin e deputetit është edhe tregues se miqtë e dikushëm në PD, sot janë rivalët e njëri-tjetrit.
