Fatmir Xhafaj ka rrëfyer për gazetaren Valentina Madani eksperiencën e tij si kandidat fitues në listat e hapura të PS. Pa kursyer elozhet për shefin e tij, zoti Xhafaj shpreh keqardhjen që në parlament do të mungojnë disa nga figurat me eksperiencë të PS.
“Sigurisht që ndjej keqardhje që shumë prej kolegëve e miqve të mi nuk do t’i kem krah rrugëtimit tonë në parlamentin e ri, por i tillë është rezultati i garës përmes një liste të hapur të këtij formati siç u ndërtua kësaj here. Jo çdo gjë varet nga cilësitë e kandidatit dhe beteja e kontributi që ai jep, por edhe nga rrethana e faktorë të tjerë jashtë tij,” tha zoti Xhafaj, duke vënë theksin edhe tek mungesa e profilit të juristëve në grupin parlamentar të PS:
“Këtë e shoh sidomos në rastin tonë në përfaqësimin e juristëve. Ndoshta kjo do të duhej të ishte menduar e organizuar më mirë.”
Sigurisht që për këtë “mungesë” të juristëve në krah të Fatmir Xhafajt ka menduar Edi Rama, i cili ka përfshirë në parlamentin e ardhshëm juristë të rinj dhe jo të përzgjedhurit e Xhafajt.
Me gjasë, ky i fundit do të vijojë punën në komisionin e posaçëm parlamentar që nisi nga puna rreth një vit më parë dhe kishte në fokus një reformë në reformën e drejtësisë, përfshirë dhe kufizimin e objektit të punës së SPAK, edhe pse kjo u kamuflua me përcaktime ku theksi vihej tek të drejtat e njeriut.
