Kreu i Partisë Demokratike, Sali Berisha, ka bërë një thirrje të drejtpërdrejtë ndaj presidentit amerikan Donald Trump dhe qeverisë së SHBA, duke kërkuar që kartelet e drogës në Shqipëri të shpallen organizata terroriste.
Deklarata u bë në reagim ndaj operacionit “Ura”, ku Prokuroria e Posaçme përmendi për herë të parë në mënyrë të qartë ekzistencën e karteleve të drogës në vend. Berisha theksoi se ndryshimet në administratën amerikane krijojnë një moment të përshtatshëm për të ndërmarrë një hap të tillë të fortë kundër krimit të organizuar shqiptar.
“Në qeverinë e SHBA ka një ndryshim cilësor e të rëndësishëm. Prokuroria e Përgjithshme flet për kartele droge, Trump i ka shpallur disa kartele terroriste. I bëj thirrje Trump dhe qeverisë amerikane të shpallë terroriste kartelet këtu që lëvizin miliarda euro para droge dhe që i lajnë lirshëm pa asnjë lloj kufizimi me firmën e Ramës,” u shpreh Berisha.
Ai theksoi se shpallja si organizata terroriste e grupeve mafioze shqiptare do të ishte një kontribut i madh për sigurinë kombëtare dhe rajonale, por edhe për aleancën euroatlantike.
Sipas tij, Partia Demokratike është e gatshme të paraqesë çdo provë që implikon kryeministrin Edi Rama dhe figura të tjera të mazhorancës në lidhje me aktivitetin e këtyre grupeve kriminale.
“I bëj thirrje presidentit Trump dhe qeverisë së SHBA të deklarojë terroriste këto grupe shqiptare, të cilat janë ndër më të rrezikshmet në rajon, Europë dhe në botë. Të cilat lëvizin miliarda, miliarda, miliarda euro, para droge dhe që i lajnë ato lirshëm, pa asnjë lloj kufizimi në Shqipëri me firmën e kreut të këtyre karteleve, Edi Rama,” deklaroi Berisha.
