Kandidati i Partisë Demokratike në listën e hapur për qarkun e Durrësit, Aulon Kalaja, ka deklaruar publikisht se do ta çojë deri në fund betejën për të zbardhur parregullsitë që, sipas tij, kanë ndodhur në procesin zgjedhor.
I ftuar në emisionin “Opinion” në News24, Kalaja u shpreh se ka kërkuar nga Komisioni Qendror i Zgjedhjeve pamjet filmike të votimit, si për subjektet politike ashtu edhe për kandidatët individualë, pasi synon të analizojë në detaje procesin që nga momenti i votimit deri te numërimi i fundit.
“Jam i pari që kam depozituar dy kërkesa në KQZ, një për pamjet filmike dhe një për rinumërimin e kutive të votimit, fillimisht në Krujë dhe Durrës. Kam qenë vetë për 9 ditë në qendrat e numërimit, deri te kutitë e votës së diasporës. Kam parë numërues që flinin nëpër shkallë”, tha Kalaja.
Ai shtoi se edhe pse KQZ pritet të shpallë nesër rezultatin përfundimtar për qarkun e Durrësit, kjo nuk do ta pengojë të kërkojë rinumërimin e votave nëse konstatohet ndonjë parregullsi.
“Pamjet po kopjohen dhe do të më vihen në dispozicion. Kam time code-t ku janë shënuar parregullsitë. Procesi është ende i hapur për hetim dhe transparencë. Kam bërë edhe një seancë në KAS, por kërkesa ime u rrëzua, pasi sipas Kodit Zgjedhor, është KQZ që shpall rezultatin përpara se të mund të ankimohet. Duhet vula zyrtare e PD për të kërkuar rinumërim”, sqaroi ai.
Kalaja theksoi se ka investuar personalisht në këtë garë, pa sponsorizime apo luks: “Kam harxhuar 6 milionë lekë të vjetra. Nuk kam shtruar iftare, nuk i jap makinës, kam vetëm një telefon. Nuk kam paguar as për dalje në televizion gjatë fushatës. Unë e bëj këtë betejë për transparencë”.
Në fund të deklaratës së tij, Kalaja apeloi që edhe organet e drejtësisë të përfshihen: “Prokuroria duhet të hetojë. Nuk dua të paragjykoj, por jam i vendosur ta çoj këtë betejë deri në fund.”
