Kryeministri Edi Rama ka komentuar me humor dhe ironi fitoren në zgjedhjet e 11 majit, gjatë një interviste me Richard Attias, organizatorin e Forumit të Iniciativës së Investimeve të Ardhshme (FII).
Në bisedën me Attias, Rama tha se është vënë në siklet nga kolegët e tij socialistë që e pyesin se si është e mundur të fitojë katër mandate radhazi si një politikan i majtë. “Ndoshta fitoj sepse nuk jam një socialist i mirë,” tha ai me batutë.
I pyetur për prioritetet e mandatit të tij të katërt, Rama theksoi se ato përmblidhen në një fjalë të vetme: “BE-ja”. Ai u shpreh se dritarja e integrimit europian është hapur dhe se agresioni i Vladimir Putinit ndaj Ukrainës ka qenë një faktor kyç në zgjimin e vëmendjes së Europës për zgjerimin.
“Në një farë mënyre, është e trishtë që na duhej Putini që kjo dritare të hapej,” u shpreh Rama, duke shtuar se shpreson që edhe një tjetër zhvillim global, si rizgjedhja e Donald Trump-it, të shërbejë si shtysë që Europa të kalojë nga fjalët në veprime konkrete.
Kryeministri shtoi se, nëse Shqipëria arrin të përfitojë realisht nga kjo mundësi, atëherë katër mandatet e tij do të kenë pasur vlerë të plotë.
Richard Attias: Z. Kryeministër, pak ditë më parë, ju u rizgjodhët për mandatin e katërt me radhë, që është historike për Shqipërinë. Cilat do jenë tri përparësitë kryesore tuajat për këtë mandat?
Kryeministri Edi Rama: Së pari, më duhet të ndaj me ju që jam zënë paksa në bela me kolegët socialistë, sepse kur dikush më pyeti, “si është e mundur që je socialist, ke fituar katër mandate?”
Richard Attias: Ndodh, sepse jeni humanist.
Kryeministri Edi Rama: “Çfarë do iu thoshe të tjerëve?” I thashë: “Dëgjo, nuk di ç’të të them. Ndoshta fitoj, sepse nuk jam një socialist i mirë.” Tani që flasim, tri gjërat kryesore për ne janë BE-ja, BE-ja, BE-ja. Dritarja e mundësisë është hapur. Është shumë e trishtë që na duhej Putini, që kjo dritare mundësie të hapej, sepse ishte agresioni i tij kundër Ukrainës që i zgjoi të gjithë nga gjumi dhe e ktheu në veprim mesazhin përherë shumë të qartë, por vetëm me fjalë, se një ditë, Europa do të jetë e bashkuar. Unë shpresoj që edhe zgjedhja e Donald Trump-it do ta shtyjë Europën të kthejë në veprime gjërat e duhura. Nëse ne ia dalim, atëherë katër mandatet do t’ia kenë vlejtur.
