Kreu i Partisë Demokratike, Sali Berisha, ka reaguar ashpër pas publikimit të rezultateve zgjedhore, duke i cilësuar ato si një “farsë elektorale” të organizuar nga regjimi në pushtet. Në një deklaratë për mediat, Berisha theksoi se procesi zgjedhor nuk ishte as i lirë dhe as demokratik, por i manipuluar përmes mjeteve klienteliste dhe abuzimeve me pushtetin.
“Kishte asfaltime, falje gjobash, përdorim të bandave dhe patronazhistëve – pra nuk kishte garë, por farsë”, u shpreh Berisha, duke përmendur gjithashtu edhe një dënim ndërkombëtar për zgjedhjet përmes Rezolutës së Valencias nga parti të mëdha të djathta europiane.
Berisha kritikoi edhe partitë e reja politike, të cilat sipas tij refuzuan bashkëpunimin me opozitën dhe kontribuan në dobësimin e saj. “Opozita iu afrua këtyre forcave që bënin opozitën e opozitës, iu ofroi koalicionin dhe ata refuzuan. Përpos Arlind Qorit, të tjerët morën deputetë sa Tom Doshi. Ata i hoqën opozitës 8 deputetë”, tha ai.
Duke e përshkruar sistemin si një model farsë ku “fiton gjithmonë diktatura”, Berisha përfundoi se kush mendon se mund të fitojë në këtë sistem, “beson në gënjeshtrën e tij”.
