Aleanca për Shqipërinë Madhështore ka dorëzuar në Komisionin e Ankesave dhe Sanksioneve (KAS) një kërkesë për ankimimin e rezultatit zgjedhor në qarkun e Kukësit, edhe pse në këtë qark PD ka dalë fituese me dy mandate, përballë një mandati të Partisë Socialiste.
Në ankimim, PD ngre akuza për blerje votash, tjetërsim të votave të diasporës dhe manipulime në favor të maxhorancës. Sipas tyre, rezultati është miratuar nga KQZ në kundërshtim me Kodin Zgjedhor dhe standardet demokratike.
“Të gjitha faktet, indiciet dhe provat në disponimin tonë provojnë në mënyrë të qartë dhe të pakundërshtueshme se kemi të bëjmë me shkelje të rënda të dispozitave të Kodit Zgjedhor”, thuhet në ankimim.
PD thekson se problemet në këtë qark, që përfshin Kukësin, Tropojën dhe Hasin, janë të lidhura me izolimin gjeografik, varfërinë strukturore dhe përdorimin politik të burimeve publike. Ata akuzojnë se në zgjedhjet e 11 majit është përdorur administrata shtetërore për qëllime elektorale, janë intimiduar votuesit dhe janë përfshirë grupe me interesa kriminale.
Në mbështetje të pretendimeve, PD i referohet edhe raportit të misionit të vëzhgimit të OSBE-ODIHR, i cili sipas tyre, konstaton përdorimin e burimeve administrative nga partia në pushtet, duke krijuar avantazh të padrejtë elektoral.
“Presioni mbi nëpunësit civilë, aktivizimi i strukturave të patronazhimit dhe intimidimi i votuesve të opozitës janë evidente dhe bien ndesh me çdo standard demokratik”, thekson PD në ankimim.
Sipas saj, në zona si Tropoja dhe Hasi, ku varfëria është e përhapur, vota është cenuar përmes premtimeve për ndihmë ekonomike dhe shantazhit për vende pune në administratë.
PD përfundon se qarku i Kukësit është pasqyra e brishtësisë demokratike në vend, ku mungesa e përfaqësimit real dhe instrumentalizimi i varfërisë e kanë kthyer garën zgjedhore në farsë.
