Irisi "ngushëllon" Gjylametin: PS do të të gjejë një punë. Paralajmëron ligj për mediat online

Pas përfundimit të garës për mandatin e deputetit mes Olta Xhaçkës dhe Blerina Gjylametit, ku fituese doli Xhaçka me një diferencë të ngushtë votash, Iris Luarasi, tashmë deputete, "ngushëllon" publikisht Gjylametin duke thënë se Partia Socialiste, si forcë qeverisëse, do t’i gjejë një vend në qeveri. Luarasi vlerësoi veprimin e Gjylametit që nuk ankimoi rezultatin, duke ruajtur imazhin e partisë. Në intervistën e saj të parë me mandatin e deputetes,Luarasi u shpreh për një iniciativë ligjore të mundshme ndaj dhunës online, duke paralajmëruar një ligj për mediat online. Në deklaratën e saj Irisi Luarasi, drejtuese e një shoqate për dhunën ndah grave, bëri një krahasim aspak me vend ku tha se një “dru i dhënë ndaj një gruaje brenda mureve të shtëpisë është më i lehtë, kjo e provuar me studime, sesa dhuna online”. Deklaratë që më shumë se mbrojtje të dhunës online tregon qëndrimin e saj, sidomos në kontekstin e kritikave që ajo ka marrë nga mediat online lidhur me publikimin e pagave të drejtuesve të OJF-ve, përfshirë atë të saj. Sapo të hyjë në Parlament Luarasi paralajmëroi hartimin e një ligji për median online dhe mbrojtjen e grave nga dhuna. Shkrimi i plotë

Beteja për mandatin e deputetit në Parlament mes Olta Xhaçkës dhe Blerina Gjylametit ka përfunduar, njëra mori mandatin, tjetra jo. Gara u nda nga një grusht votash duke çuar zyrtarisht Olta Xhaçkën në Kuvend, ndërsa Blerina Gjylametin jo. Menjëherë pas kësaj ngjarjeje Blerina Gjylameti kërkoi nga KQZ filmimet e numërimit, për transparencë. Rama mori situatën nën kontroll dhe me urdhër partie kërkoi të mos bëheshin qesharakë, "pas humbjes së garës, mos humbisni edhe fytyrën", duke tërhequr veshin secilit që guxon të dalë jashtë vijës së partisë.

Sot, Iris Luarasi me mandat deputeti në xhep ka "ngushëlluar" ish kolegen Blerina Gjylameti. Gjatë intervistës së parë për mediat në emisionin "Kjo javë" të News 24" pas marrjes së mandatit, e pyetur për betejën Xhaçka-Gjylameti, kjo e fundit nuk duhet të mërzitet pasi PS është parti qeverisëse dhe me siguri do të gjejë një vend në qeveri. Se çfarë paralajmëron Irisi është ende e paqartë, por mbase për kandidatët për deputetët të listave të hapura që mbeten pa mandat mbase mund t'u ofrohet një post në kabinet. Dhe kjo vlen më shumë për Blerina Gjylameti që hoqi dorë nga ankimimi i procesit të numërimit në KQZ, duke i shpëtuar fytyrën Ramës dhe PS.

Më tej gjatë intervistës, gazetarja Nisida Tufa pyeti Irisin mbi objektivat që do ketë si deputete brenda parlamentit. Dhe si drejtuese e një prej shoqatave në mbrojtje të grave të dhunuara, bëri një krahasim aspak me vend, kur tha se duhej propozuar një ligj për dhunën online. Ajo tha se "një dru ndaj një gruaje brenda mureve të shtëpisë një është asgjë në krahasim me një dhunë online" dhe sipas saj kjo është e provuar shkencërisht. E papranueshme gjuha me të cilën shprehet Iris Luarasi, si një prej drejtuesve të shoqatës në mbrojtje të grave të dhunuara. Por më shumë se mbrojtjen e grave të dhunuara, duket se Iris Luarasit nuk i del inati me mediat online që publikuan borderot me pagat e drejtuesve të OJF-ve, ndër to edhe Irisi, çka prodhoi një lumë akuzash dhe sulmet kundrejt saj. Nesër Irisi në parlament paralajmëroi që do të hartonte një ligj për median online dhe kundër dhunës ndaj grave dhe vajzave.