Ish-drejtuesi politik i Partisë Demokratike për Tiranën në zgjedhjet e 11 majit, Belind Këlliçi, ka vlerësuar lartë bashkëpunimin me strategun amerikan Kris La Civita gjatë fushatës elektorale.
I ftuar në studion e A2CNN, Këlliçi u shpreh se puna me La Civita ka qenë “e jashtëzakonshme”, duke lënë të hapur mundësinë e vijimit të këtij bashkëpunimi edhe në zgjedhjet e ardhshme.
I pyetur për rezultatin e dobët të disa prej partive aleate, Këlliçi theksoi se mbetet i mendimit që lista e kandidatëve për deputetë të Partisë Demokratike duhej të kishte më shumë përfaqësues nga radhët e demokratëve. Sipas tij, një përbërje e tillë do të pasqyronte më mirë strukturën dhe besnikërinë brenda forcës politike që ai përfaqëson.
Megjithatë, ai shtoi se performanca e aleatëve do të jetë pjesë e analizës që do të zhvillohet në forume brenda PD-së. Sa i takon rezultatit final të PD, Këlliçi tha se do i duhet 2 muaj kohë për të faktuar atë që opozita e quan “masakër elektorale”.
