Deputeti i Partisë Demokratike, Dashnor Sula, ka dhënë sinjale të forta për të ardhmen e tij politike, duke lënë të hapur mundësinë për një kandidim në krye të PD-së, por edhe duke theksuar se mund të largohet përfundimisht nga kjo forcë politike nëse ajo vijon të drejtohet nga figura të vjetra dhe të konsumuar.
I ftuar në studion e televizionit News24, Sula theksoi se është gati të marrë përgjegjësinë për të drejtuar Partinë Demokratike nëse Sali Berisha tërhiqet nga posti i kryetarit. Ai e konsideroi veten një alternativë të mundshme për të ringritur partinë dhe për të rikthyer besimin e publikut në të djathtën shqiptare.
“Nëse Sali Berisha jep dorëheqjen nga drejtimi i Partisë Demokratike, unë jam alternativë për të kandiduar për postin e kryetarit. Kam vullnetin, përvojën dhe integritetin për të kontribuar në një fazë të re të Partisë Demokratike, larg konflikteve të brendshme dhe figurave që e kanë mbajtur peng partinë për vite me radhë,” – u shpreh Sula gjatë intervistës.
Megjithatë, ai nuk la vend për dyshime kur tha se, nëse drejtimin e PD-së vijojnë ta kenë figura si Sali Berisha, Flamur Noka apo Albana Vokshi, atëherë ai nuk do të ketë më asnjë lidhje me këtë subjekt politik.
“Nëse PD drejtohet ende nga Berisha, Noka apo Vokshi, unë nuk e shkel më atë prag. Ata e kanë çuar partinë drejt një rruge pa kthim. Me këta persona brenda, PD do të zhbëhet,” – deklaroi ai me tone të forta.
Sula ka qenë një prej zërave më kritikë brenda Partisë Demokratike gjatë viteve të fundit, duke kërkuar riformatimin e saj dhe shkëputjen përfundimtare nga trashëgimia politike e Sali Berishës. Ai ka kërkuar prej kohësh hapjen e partisë ndaj figurave të reja dhe forcimin e institucioneve të brendshme të saj.
Në këtë linjë, ai la të hapur edhe mundësinë e krijimit të një poli të tretë politik, si një alternativë reale mes dy blloqeve tradicionale të politikës shqiptare.
“Nëse PD nuk ndryshon rrënjësisht, unë do të përpiqem të jap kontributin tim ndryshe. Nuk përjashtoj mundësinë për të nisur një nismë të re, ndoshta për krijimin e një poli të tretë, që t’i japë fund përçarjes dhe polarizimit që ka mbërthyer vendin,” – shtoi ai.
Dashnor Sula konfirmoi gjithashtu se nuk do të jetë më pjesë e parlamentit pas përfundimit të këtij mandati. Ai zgjodhi të mos kandidojë në zgjedhjet e 11 majit, duke refuzuar të jetë pjesë e listës së hapur të PD-së. Kjo vendimmarrje e tij shihet si një tjetër sinjal i qartë i shkëputjes graduale nga strukturat aktuale të partisë.
