Debat u zhvillua në emisionin “NOW me Erla Mëhillin” mes dy deputetëve të sapozgjedhur nga zgjedhjet e 11 majit: Besart Xhaferri nga Partia Demokratike dhe Ardit Bido nga Partia Socialiste. Çështja e kandidaturës së Fredi Belerit ndezi diskutimin mes tyre, me akuza për oportunizëm dhe kalkulime politike.
Pjesë nga debati:
Besart Xhaferri: “Aman, vetëm për Fredi Belerin mos fol.”
Ardit Bido: “Patjetër, sepse e ke mik.”
Xhaferri: “Mos fol për çështje patriotike tani. Je oportunist kur flet për patriotizëm. Unë kur flas për patriotizëm, flas për të gjitha. Unë Fredi Belerin s’doja fare ta kisha aleat. Si Besart Xhaferri, s’doja fare, e kam deklaruar. Por jemi detyruar nga Gjykata e Shqipërisë që nuk na dha vulën, dhe vetëm dy parti na e dhanë. Ishim të kushtëzuar që ata aleatë të vendosnin kandidatin.”
Erla Mëhilli: “Pra, për shkak të Dules vutë Fredi Belerin?”
Xhaferri: “Pse për çfarë, si do garonim ne?”
Për herë të parë, Xhaferri pranoi hapur se kandidatura e Belerit ishte një lëvizje taktike dhe jo një zgjedhje e vullnetshme e tij apo forcës politike që përfaqëson.
“Beleri na ngeli në derë, se na duhej për vulën,” – kjo ishte ideja e Xhaferrit për Fredi Belerin, i cili në fakt ishte në krah të Sali Berishës gjatë fushatës së zgjedhjeve të 11 majit dhe një nga zërat kryesorë pro kryetarit të PD-së. Tani, ose Sali Berisha ka ndryshuar kurs politik ndaj Fredi Belerit, ose Besart Xhaferri nuk e di ende se në një formacion politik si PD, nuk është mirë të thuash publikisht gjëra që nuk janë në sinkron me qëndrimet e kryetarit të partisë.
