Kryetari i Partisë Demokratike, Sali Berisha, në emisionin “Cim Peka Live” në Syri Tv, u shpreh se nuk do të përdor revolucion që të sigurojë votën e lirë për shqiptarët. Berisha tha se kurrë nuk ka qenë për revolucione, pasi sipas tij të nxjerr jashtë sistemit. Ndërsa më tej, ai gjithashtu tha se revolucioni do dhunë, dhe ai është kundër dhunës që nga 1990-ta.
“Të parashikosh një revolucion me dhunë dhe me forma të tjera dhune, del jashtë sistemit. Po unë nuk kam qenë i tillë kurrë. Se unë që nga 90 e sot, unë jam kundër dhunës, kjo është shumë e njohur” – tha Berisha.
Deklarata e Berishës është paradoksale, pasi nëse ka një politikan që ka përdorur më shumë në 35 vite demokraci fjalën revolucion, është pikërish ai. Madje, hera e fundit kur shpalli revolucion ishte para dy vitesh, kur bëri Foltoren për të rimar logon dhe vulën e PD. Madje, parlajamëronte se revolucioni do të përmbyste edhe Ramën brenda 6 muajve.
Për t'ia rikujtuar, po sjellim një pjesë nga fjala e tij në një konferencë për mediat që zhvillonte në shkurt të vitit 2023.
“Ne jemi në një revolucion dhe prapë do ndalem këtu. Kjo është një fjalë pak si e lartë dhe jo rrallë po më thonë pse po e përdor këtë term. Sepse ne kemi një regjim monist që ka vendosur sistemin ‘de facto’ të eleminimit të votës” – shprehej Berisha.
Mesa duket kryedemokrati ka zgjedhur një retorikë tërrësisht kontradiktore dhe jo binëse për të justifikuar humbjen e thellë që pësoi në zgjedhjet e 11 majit. Pasi, vështirë se ka shqiptar që ta besojë se Sali Berisha është i vetmi politikan që ka qenë kundër dhunës.
