Kreu i Partisë Shqipëria Bëhet, Adriatik Lapaj, ka kërkuar zyrtarisht rinumërimin e votave për qarqet Fier dhe Vlorë, duke pretenduar se ka mospërputhje të konsiderueshme midis rezultatit të kutive të votimit dhe procesverbaleve të miratuara nga KZAZ-të.
“Sapo morëm pamjet filmike pasi vetëm dje na u vunë në dispozicion të plota. Gjatë shqyrtimit të tyre konstatuam mospërputhje domethënëse mes votave faktike dhe atyre të pasqyruara në procesverbalet zyrtare”, deklaroi Lapaj.
Ai theksoi se në këto dy qarqe mandati i partisë është humbur me diferencë të vogël nga Partia Socialiste, ndaj ka vend për rinumërim të plotë të votave.
“Nëse edhe një votë është prekur, përgjegjësit do të ndiqen penalisht. Për çdo kuti ku konstatohen manipulime, do të dorëzojmë kallëzim penal në prokurori,” shtoi Lapaj, duke theksuar se kërkesa për rinumërim do të depozitohet sot në KQZ.
Sipas të dhënave të bëra publike nga Lapaj, disa nga shkeljet e konstatuara janë:
ZAZ 55, VNV 55/3, kutia 2831/00: Janë shtuar 4 vota për PS dhe janë hequr 2 vota nga Nisma SHB;
ZAZ 60, VNV 60/3, kutia 3017: Dy vota të pavlefshme janë kaluar si të vlefshme për PS-në;
ZAZ 60, VNV 60/3, kutia 2997/00: Janë shtuar 2 vota për PD dhe 4 vota për PS;
ZAZ 56, VNV 56/5, kutia 288/01: Janë shtuar 2 vota për PS dhe është hequr një votë për Lëvizjen Atdheu;
ZAZ 56, VNV 56/3, kutia 2866/01: Është hequr një votë nga Nisma SHB dhe janë shtuar 3 vota të pavlefshme;
ZAZ 56, kutia 2862/01: Janë hequr 2 vota nga Nisma SHB dhe janë shtuar 2 vota të pavlefshme.
Lapaj tha se nuk kërkon përfitim të padrejtë, por një proces të drejtë dhe të ndershëm: “Ne mund të mos i kemi këto mandate, por çdo votë duhet të numërohet siç është hedhur.”
KQZ pritet të shqyrtojë kërkesën gjatë ditëve në vijim.
