Kryeministri Edi Rama, mesa duket i ka “fituar zemrën” edhe mikut të Sali Berishës, ish-eurodeputetit Elmar Brok. Të paktën këtë tregon fotoja e fundit që ka hedhur në rrjetet sociale, ku kryeministri shfaqet me Brok gjatë një ceremenonie në Gjermani, ndërsa ka ndarë dhe batutat që kanë shkëmbyer gjatë bisedës.
“Elmar Brok: Edi, urime! Eh, erdha përsëri në Tiranë të të vrisja, po ti sa herë unë vij të të vras ngjitesh më lart!
Unë: Elmar, vetëm një gjë s’kam për të ta falur kurrë! Vjen në Tiranë dhe s’pi një kafe me mua, ndërkohë që unë të jam borxhli, sepse siç thoshte Niçja, “Çfarë s’të vret të bën më të fortë”!
Plas e qeshura dhe përqafohemi si miq të vjetër.
Aachen, Gjermani” - shkruan Rama.
Ish-eurodeputetit gjerman, Elmar Brok, njihet si një mik i ngushtë i kryetarit të PD, Sali Berisha. Ai madje në maj 2024, u shfaq në ballkonin e shtëpisë së Berishës, kur ky i fundit ndodhej në arrest shtëpiak. Ndërsa gjatë fushatës zgjedhore mori pjesë në një konferencë në Shqipëri, ku akuzoi Ramën se e kishte kthyer Shqipërinë në një narkoshtet dhe se shprehte nevojën për një ndryshim të domosdoshëm.
Por, sot çuditërisht Brok është takuar me kryeministrin Edi Rama, me të cilin ka shkëmbyer edhe një përqafim të ngrohtë.
Të jetë vallë ky veprim ‘tradhëti’ ndaj mikut të tij, Sali Berisha, apo thjesht Brok është i huaji i radhës që i interesojnë pagesat për pak propagandë në Shqipëri?
