Sali Berisha ka reaguar ashpër pas shpalljes së rezultateve të zgjedhjeve, duke deklaruar se opozita nuk e njeh rezultatin dhe se beteja për votën e lirë sapo ka nisur. Në një deklaratë publike, Berisha u shpreh se pavarësisht zhgënjimit dhe dëshpërimit të një pjese të qytetarëve, dhjetëra mijëra shqiptarë janë gati të luftojnë për të mbrojtur votën.
“Sot ka shqiptarë të dëshpëruar, ka shqiptarë të zhgënjyer, por ka dhjetëra mijëra shqiptarë që janë gati të luftojnë për votën e lirë,” u shpreh Berisha.
Duke akuzuar kryeministrin Edi Rama për manipulim dhe imponim të vullnetit të qytetarëve, Berisha theksoi se opozita zotëron dokumente që dëshmojnë parregullsitë në procesin zgjedhor.
“Mos kujtojë kush kurrë se një bandit si Edi Rama do mund të imponojë këto rezultate njerëzve të lirë të Shqipërisë. Ky është vetëm fillimi. Edhe njëherë u them shqiptarëve: durim, sepse ne kemi dokumentet,” shtoi ai.
Berisha nënvizoi se opozita nuk do të përdorë dhunën për të mbrojtur votën, por do të ndjekë çdo rrugë ligjore dhe institucionale për të kërkuar transparencë dhe drejtësi.
“Ne me kallashnikov votën nuk e mbrojmë, por tani lufta fillon. Ne nuk pranojmë kurrë zgjedhje të tilla, nuk pranojmë kurrë rezultate të tilla,” përfundoi ai.
