Pasi dështoi që ta impononte para zgjedhjeve, kreu i PD, Sali Berisha shprehet se në zgjedhjet e ardhshme do të kërkojnë qeveri teknike. Në emisionin “Ora e Betit” në Ora Neës, Berisha tha se kjo është beteja e fundit dhe se qeveria teknike ngarkohet për të përgatitur zgjedhjet.
“Tani ne kërkojmë qeveri teknike dhe të bëjmë zgjedhje. Tani ne kemi betejën e fundit. Këtu ta ketë të qartë çdo demokrat që o do përmbushim këtë mision o ska zgjidhje tjetër. Zgjidhja e vetme politike është qeveri teknike dhe zgjedhje. Qeveria teknike ngarkohet për të përgatitur zgjedhjet” – tha Berisha.
Kujtojmë se disa muaj para zgjedhjeve të 11 majit, një nga kërkesat në aksionin opozitar ishte që të formohej një qeveri teknike për të menaxhuar procesin. Por kërkesa pasi nuk u përfill nga PS, u harrua edhe nga përfaqësuesit e opozitës kur nisi fushata zgjedhore.
Ndërsa sot pas humbjes së thellë të zgjedhjeve, Berisha i është rikthyer thirrjes për qeveri teknike, që me gjasë më shumë i shërben retorikës për të thënë diçka të re në daljen e radhës televizive. Pasi edhe nëse do ta ketë seriozisht, nuk ka si t’ia imponojë superqeverisë që do të ketë për katër vitet e tjera Edi Rama.
