Reagimi i Ambasadës Amerikane pas zgjedhjeve të 11 Majit fillimisht u prit me entuziazëm nga demokratët, të cilët mes rreshtave lexonin “braktisjen” që administrata amerikane i kishte bërë Edi Ramës dhe fitores së zgjedhjeve. Por, më pak entuziast duket një ditë më pas drejtuesi politik për Tiranën, Belind Këlliçi, i cili në një intervistë për Syri TV ka sulmuar ashpër selinë diplomatike, duke e cilësuar gjuhën e tyre të drunjtë dhe “ambasadë memece”.
“Nëse ka pasur zgjedhje të lira dhe të ndershme dhe ka fituar Rama, po. Por, në një kohë kur ne e kemi njoftuar 10 ditë përpara që po blihen votat dhe bandat në Elbasan, Lezhë, Durrës po blihen, vidhen votat dhe po futen në Kuvend njerëz të inkriminuar, ambasada nuk duhej të tallej dhe të fliste si për vendet e botës së tretë, dhe jo për një vend në mes të Europës,” - deklaroi Këlliçi në intervistën televizive.
Reagimi i Belind Këlliçit vjen pas interpretimeve optimiste që deputetë dhe analistë pranë PD-së i bënë një ditë më parë deklaratës së ambasadës së SHBA-së në Tiranë.
