Ilir Alimehmeti, ka dorëzuar një ankim zyrtar pranë Komisionit të Ankimimeve dhe Sanksioneve (KAS), ku kërkon rinumërimin ose rivlerësimin e votave në të gjitha Qendrat e Votimit të qarkut Tiranë, pas zgjedhjeve të mbajtura më 11 maj.
Në kërkesën e depozituar, Alimehmeti argumenton se gjatë procesit të këqyrjes së filmimeve nga disa prej Qendrave të Votimit — të siguruara nga administrata e Komisionit Qendror të Zgjedhjeve (KQZ) — janë konstatuar parregullsi që sipas tij mund të kenë ndikuar ndjeshëm në rezultatin përfundimtar.
“Gjatë procesit të verifikimit të filmimeve të kamerave nga ana jonë, për një numër të kufizuar të cilat na janë vënë në dispozicion nga administrata e KQZ-së, janë vërejtur disa parregullsi që mund të ndikojnë në ndryshimin e rezultatit në mënyrë të ndjeshme,” thuhet në kërkesën e tij drejtuar KAS-it.
Sipas Alimehmetit, këto parregullsi përbëjnë rreth 5% të votave të numëruara, duke e konsideruar këtë një përqindje domethënëse që mund të ndikojë në shpërndarjen e mandateve.
Ai kërkon që, në bazë të dispozitave të Kodit Zgjedhor, të bëhet rinumërimi i plotë dhe të ndryshohet Tabela Përmbledhëse për qarkun Tiranë në përputhje me rezultatin e rinumërimit.
KAS pritet të shqyrtojë ankesën dhe të vendosë nëse do të hapet procesi i rinumërimit për kryeqytetin.
