Pas dorëheqjes së kryebashkiakëve socialistë të Beratit, Tepelenës dhe Matit, Ervin Demo, Tërmet Peçi dhe Agron Malaj, këto bashki janë pa drejtues prej tre muajsh. Edhe pse largimi i tyre është zyrtarizuar që më 11 mars, Këshilli i Ministrave ende nuk ka njoftuar Presidentin për vakancat, çka pengon shpalljen e zgjedhjeve të pjesshme.
Ligji kërkon koordinim mes Kushtetutës, Kodit Zgjedhor dhe ligjit për qeverisjen vendore, por dorëheqja nuk trajtohet qartë në këto akte, duke lënë vend për interpretime.
Ndërkohë, edhe Tirana dhe Tropoja janë pa kryebashkiakë aktivë, përkatësisht për shkak të arrestimit të Erion Veliajt dhe arrestit shtëpiak të kryetarit të Tropojës. Në Rrogozhinë, kryebashkiaku Edison Memolla nuk është larguar nga detyra pavarësisht një dënimi për krime zgjedhore, çështje që është në shqyrtim nga Apeli i Posaçëm.
