Ambasada e Shteteve të Bashkuara në Shqipëri ka shpërndarë sot një deklaratë të fortë nga Sekretari Amerikan i Shtetit, Marco Rubio, ku dënon emigrimin masiv dhe e lidh atë drejtpërdrejt me trafikun e qenieve njerëzore.
Në mesazhin e publikuar, Rubio thekson se emigrimi i pakontrolluar nuk është një akt humanitar, por një rrezik serioz për jetën e njerëzve që shpesh bien pre e rrjeteve kriminale.
“Ne duam të parandalojmë emigrimin masiv sepse ai i jep shtysë trafikimit të qenieve njerëzore. Në shumë raste, emigrimi masiv është trafikim i qenieve njerëzore. Nuk ka asgjë humanitare, asgjë të dhembshur në emigrimin masiv. Të vetmit njerëz që përfitojnë nga emigrimi masiv janë trafikantët,” – u shpreh Rubio.
Deklarata vjen në një kohë kur emigracioni i paligjshëm nga Ballkani drejt SHBA-së dhe vendeve të tjera perëndimore ka shënuar rritje. Sipas autoriteteve amerikane, rrugët e rrezikshme të emigrimit përdoren nga grupe kriminale që përfitojnë nga dëshpërimi i njerëzve për një jetë më të mirë.
Ambasada Amerikane ka theksuar në mënyrë të përsëritur nevojën për zgjedhje të sigurta, të ligjshme dhe të rregullta për ata që kërkojnë të udhëtojnë apo të emigrojnë drejt SHBA-së, duke paralajmëruar rreziqet serioze që vijnë nga rrugët ilegale.
