Kandidatja për deputete e PD në qarkun e Durrësit, Andia Ulliri, ka folur për ankimin që ka depozituar në KQZ, ku kërkon që mandati i deputetit nga lista e hapur t’ikalojë asaj.
Në një intervistë për mediat, Ulliri tha se kërkesa e saj vë në dijeni të KQZ-në për çështjen e kuotës gjinore. Sipas saj, kuota gjinore ndonëse është parashikuar në Kushtetutë, por ndryshimet e shpeshta në kodin zgjedhor ka cënuar edhe kuotën gjinore dhe barazinë gjinore.
“Kërkesa ime e cila është depozituar në KQZ është një kërkesë që vë në vëmendje KQZ-në për çështjen e kuotës gjinore. Unë nuk kam qenë një nga kandidatët që ka kontestuar në raport me rinumërim apo kërkesë për rivlerësim të votave, por kam qenë një nga kandidatet e cila ka marrë përsipër një kauzë e cila ka qenë vënia në vemendje të KQZ-së për çështjen e kuotës gjinore.
Kuota gjinore është e parashikuar në Kushtetutë por duke qenë se kodi i ri zgjedhor ka patur disa ndryshime, pra ka listën unike që përbëhet nga ajo e hapur dhe e mbyllur, në një keqinterpretim të saj, ajo nuk trajtohet si një listë e vetme por si dy lista të ndara duke cënuar drejtëpërdrejtë edhe kuotën gjinore dhe ligjin për barazinë gjinore” - tha ajo.
Ulliri është e treta më e votuara në listën e hapur në Durrës dhe nëse KQZ i jep të drejtë, ajo merr mandatin e kandidatit Aian Ndoja.
