Ilirjana Kuçana, kandidate e Partisë Demokratike në listë të hapur për qarkun e Durrësit në zgjedhjet e 11 majit, ka ngritur akuza të forta për organizimin e brendshëm të PD-së në këtë qark.
Në një intervistë për A2CNN, Kuçana ka treguar se është përballur me kërcënime dhe presione nga grupe kriminale gjatë gjithë fushatës elektorale, ndërkohë që, sipas saj, është lënë e vetme përballë kësaj situate.
“Kam pritur më shumë mbështetje nga drejtuesi politik i Durrësit, Oerd Bylykbashi. Në Durrës ka banda kriminale, që politika nuk guxon t’i përmendë as emrin” deklaroi ajo.
Kuçana nuk nguroi të kritikojë as procesin e përzgjedhjes së kandidatëve në të gjithë vendin, duke e cilësuar atë si të nxituar dhe të mbushur me vendime të padrejta.
“Sot, PD ka disa drejtues që janë humbës serialë. Ka ardhur koha të flasim hapur për këtë. Nuk mund të pretendosh fitore me të njëjtët njerëz që kanë dështuar vazhdimisht,” tha ajo.
Pak ditë më parë, Kuçana kërkoi edhe rinumërimin e votave preferenciale për kandidaturën e saj, duke pretenduar se votat i janë vjedhur nga kandidatë të tjerë brenda listës së PD-së. Megjithatë, kërkesa e saj u rrëzua nga Komisioni i Ankesave dhe Sanksioneve (KAS), pasi, sipas vendimit, një kërkesë e tillë mund të bëhet vetëm nga vetë partia politike.
