Kreu i Lëvizjes “Shqipëria Bëhet”, Adriatik Lapaj, tha se ende nuk është vendosur nëse do ta mbajë vetë mandatin e fituar në zgjedhjet e 11 majit, apo do t’i hapet rruga kandidatit të radhës, Shaban Shkodra. Sipas tij, vendimi do t’i takojë kryesisë së partisë.
“Kam deklaruar më herët se një mandat do të ishte dështim për mua. Tani që jemi renditur forcë e tretë, përfaqësimi është i rëndësishëm, por vendimin do ta marrë kryesia,” u shpreh Lapaj në “Report Tv”.
Ai tha se rezultati prej 64 mijë votash ishte i ndershëm, por jo në pritshmëritë e tyre. Lapaj kritikoi qeverinë për parregullsi dhe përdorim të institucioneve gjatë fushatës, por shtoi se nuk do të fajësojë popullin për rezultatin.
I hapur për bashkëpunim me çdo forcë që përfaqëson vlera, Lapaj theksoi se drejtësia është vija e kuqe. Duke komentuar përplasjet me Agron Shehajn, tha se mungesa e bashkimit dëmtoi të gjithë opozitën e re dhe se ai vetë ka bërë përpjekje të vazhdueshme për një front të përbashkët.
“E kam kërkuar bashkimin me këmbëngulje. Në vend të dorës së shtrirë mora baltë, por nuk ndjej përgjegjësi – sepse luftova fort,” tha ai.
