Në një zhvillim të fundit Partia e Lirisë ka kërkuar rinumërimin e votave në bashkinë e Kavajës, e vetmja zonë në vend ku Partia Demokratike arriti të sigurojë më shumë vota.
Sekretari i Përgjithshëm i Partisë së Lirisë, Tedi Blushi, ka depozituar sot një kërkesë zyrtare pranë Komisionit Qendror të Zgjedhjeve (KQZ), duke ngritur dyshime për parregullsi gjatë procesit të numërimit të votave.
“Kërkesa jonë është në funksion të transparencës dhe legjitimitetit të rezultatit përfundimtar,” deklaroi Blushi, duke bërë publike edhe kërkesën e dorëzuar pranë institucionit zgjedhor.
Sipas dokumentit të paraqitur në KQZ, Partia e Lirisë kërkon hapjen e kutive dhe rinumërimin e fletëve të votimit për të gjitha njësitë administrative që përbëjnë Bashkinë e Kavajës: Kavajë, Golem, Synej, Helmas dhe Luz i Vogël.
“Kërkesa jonë mbështetet në dyshime të arsyeshme mbi parregullsi gjatë procesit të numërimit dhe synon garantimin e transparencës dhe legjitimitetit të rezultatit përfundimtar,” thuhet në kërkesën zyrtare.
Ende nuk ka një reagim nga Komisioni Qendror i Zgjedhjeve apo nga Partia Demokratike lidhur me këtë zhvillim, ndërsa pritet që KQZ të shqyrtojë kërkesën në ditët në vijim.
