Si rrjedhojë e rritjes së tensioneve mes protestuesve dhe policisë, në terren kanë zbarkuar dhe Forcat e Ndërhyrjes së Shpejtë për të garantuar sigurinë e perimetrit tek Parlamenti. Ndërsa protestuesit gjuajnë me vezë makinat e deputetëve që dalin nga Kuvendi.
Tubimi, i cili po vijon prej më shumë se dy orësh, po zhvillohet në kushtet e temperaturave të larta, çka nuk i ka penguar qytetarët të vazhdojnë qëndresën e tyre. Pjesëmarrësit në këtë tubim kanë artikuluar kërkesa të qarta politike, ku kryesoret mbeten dorëheqja e menjëhershme e Kryeministrit dhe e kabinetit të tij qeveritar, si dhe anulimi i disa ligjeve të miratuara apo në proces miratimi.
Gjatë grumbullimit, protestuesit kanë shfaqur një qëndrim të prerë ndaj mazhorancës duke lëshuar thirrje të vazhdueshme në drejtim të sallës ku po mbahet seanca plenare. Mes sloganeve kryesore të dëgjuara në shesh spikatën thirrjet si "Poshtë diktatura!", "Parlament i krimit" dhe "Anuloni ligjet!".
Pavarësisht tensioneve të raportuara herë pas herë, situata mbetet nën monitorimin e rreptë të forcave të rendit, të cilat kanë krijuar një kordon sigurie për të parandaluar eskalimin e mëtejshëm të ngjarjes.
