Pas ditësh spekulimesh për pakënaqësitë e saj brenda Partisë Socialiste dhe raportet me kryeministrin Edi Rama, deputetja Elisa Spiropali zgjodhi të mbyllë çdo diskutim me një deklaratë të qartë besnikërie ndaj PS-së.
Para se të hynte në Kuvend, Spiropali u pyet nga gazetarët nëse kishte komunikuar me kryeministrin Rama për qëndrimet e saj të fundit, si edhe nëse mund të ndiqte të njëjtin rrugëtim si deputetja Marjana Koçeku, e cila u largua nga Partia Socialiste.
Deputetja socialiste u përgjigj se fokusi mbetet puna për vendin, ndërsa theksoi se nuk ka ndërmend të largohet nga PS.
“Jemi duke punuar. E rëndësishme është ajo që do të bëjmë për Shqipërinë. Unë jam në PS, kam qenë në PS dhe do të jem gjithmonë në PS. Në PS duhet të jenë të gjithë ata që kërkojnë një Shqipëri më të mirë, e kanë bërë historikisht, e kanë bërë edhe sot. Ata që i kanë sjellë dëme PS-së, le të shkojnë aty ku e kanë vendin”, tha Spiropali.
E pyetur edhe për një bashkëpunim të mundshëm me Ditmir Bushatin, Spiropali u shpreh se në Partinë Socialiste duhet të jenë ata që kërkojnë një Shqipëri më të mirë dhe që, sipas saj, kanë kontribuar historikisht për këtë.
