Pas mbledhjes së grupit parlamentar të Partisë Socialiste, ku mori pjesë edhe kryesocialisti Edi Rama, kreu i grupit, Taulant Balla, ka folur për mediat lidhur me zhvillimet e fundit politike, duke u ndalur te qëndrimi ndaj protestave para Kryeministrisë dhe përplasja virtuale me deputeten Marjana Koçeku.
I pyetur nga gazetarët nëse ka marrë njoftim zyrtarisht nga Marjana Koçeku që nuk do të jetë më pjesë e grupit të PS, Balla i bëri thirrje deputetes që ta dorëzojë mandatin, pasi sipas tij ai i përket forcës politike nën logon e së cilës garoi.
“Për këtë çështje ua kam sqaruar dhe nuk dua t’i kthehem më komenteve për të ushqyer një telenovelë që nuk më pëlqen. Një njeri që nuk di të respektojë ata që e kanë zgjedhur dhe personin në fjalë e ka zgjedhur PS. Të dorëzojë mandatin, s’është person i votuar drejtpërsëdrejti”, tha Balla (referuar Koçekut).
Lidhur me kritikat e publikuara nga Koçeku, e cila pretendonte se brenda grupit socialist nuk lejohej mendimi ndryshe, Balla u përgjigj shkurt:
“S’kam asnjë koment ose sepse gjatë gjithë 8 muajve, kam pasur vetëm falënderime nga deputetja për mënyrën si e drejtoj”.
Gatë fjalës së tij, Taulant Balla ka përforcuar edhe njëherë qëndrimin e mazhorancës se protestat që po zhvillohen përpara Kryeministrisë janë të frymëzuara nga interesa të huaja dhe konkurrenca rajonale, duke përmendur specifikisht edhe Iranin. Ndonëse u shpreh me respekt për qytetarët që u ngritën për kauza mjedisore, ai theksoi se protesta tashmë ka devijuar.
“Respektoj ata që dolën në protestë për çështje që lidhen me dyshime, respektimin e normave mjedisore në një investim jetik për ekonominë e vendit, një investim që do të bëhet sepse është mundësi e madhe për Shqipërinë dhe ndërkohë e kam thënë, brenda kësaj proteste janë përfshirë edhe elementë që nga dita e parë që e fryn këtë tullumbace, duket qartë që janë interesa që lidhen med konkurrencë rajonale, me influencë të vendeve jo miqësore me Shqipërinë. Ky tullumbace po shfryhet i plasur në sytë e gjithë qytetarëve shqiptarëve. 1 mln kërkesa dhe 500 kandidatë për kryeministër, kujt t’i përgjigjem. Po ju them, që këtu nuk kemi të bëjmë me një protestë që lindi për një rast të cilin bësojmë që ndajmë të njëjtin shqetësim. Ajo dhunë në Zvërnec ishte dhunë e papranueshme. Sot atë çështje e kanë harruar dhe ata për të cilën u ngritën nuk flasin më. Sot protestën atyre që e nisën, ua kanë vjedhur”, deklaroi Balla.
