Komisioni i Posaçëm Parlamentar për Reformën Zgjedhore do të zhvillojë një seancë dëgjimore të rëndësishme të mërkurën, ku në qendër të diskutimeve do të jetë integriteti i proceseve zgjedhore dhe efikasiteti i masave penale.
Ndonëse në tryezë do të jenë të pranishëm drejtues dhe përfaqësues nga institucionet kryesore të ligjit në vend, përfshirë Prokurorinë e Përgjithshme, Policinë e Shtetit dhe Agjencinë e Inteligjencës Financiare, vëmendjen kryesore do ta marrë prania e Prokurorisë së Posaçme kundër Korrupsionit dhe Krimit të Organizuar (SPAK).
Ky dëgjesë shënon një kthesl të veçantë politike për dy bashkëkryetarët e komisionit, Damian Gjiknurin (nga mazhoranca) dhe Oerd Bylykbashin (nga opozita).
Fokusi i seancës me SPAK-un do të përqendrohet te sfidat praktike të hetimit të krimeve zgjedhore, shitblerjes së votës dhe propozimet konkrete për ndryshime në Kodin Penal që do të garantonin zgjedhje më të paprekshme në të ardhmen.
Prania e SPAK-ut në komisionin e drejtuar nga Gjiknuri dhe Bylykbashi merr një peshë edhe më të madhe politike nëse rikthehemi pas në kohë. Publiku dhe korridoret e politikës kujtojnë mirë përplasjen e heshtur institucionale, kur kreu i SPAK-ut, Altin Dumani, refuzoi hapur ftesën e Fatmir Xhafajt për të raportuar në Komisionin e Posaçëm Antikorrupsion (i njohur si "Komisioni Xhafaj").
Në atë kohë, SPAK argumentoi me vendosmëri se raportimi i tyre bëhej vetëm në rrugë ligjore dhe përmes seancave vjetore të përcaktuara në Kushtetutë, duke shmangur me kujdes atë që shihej si një tentativë e politikës për të mbivendosur mekanizma kontrolli mbi drejtësinë.
Megjithatë, natyra e Reformës Zgjedhore, si një proces jetik për të ardhmen europiane të vendit dhe e njohur si një tryezë rreptësisht konsensuale, ka bërë që SPAK të jetë pjesë e këtij diskutimi teknik.
