Banorët e Rrjollit kanë paralajmëruar zhvillimin e një proteste ditën e nesërme, në orën 10:00, kundër punimeve që po zhvillohen në projektin turistik “Blue Borgo”.
Në prag të protestës ka reaguar kompania Gener 2, e cila deklaron se respekton të drejtën e qytetarëve për të protestuar në mënyrë paqësore, por thekson se asnjë kauzë nuk mund të justifikojë dëmtimin e pronës private apo të një investimi.
Sipas kompanisë, gjatë protestës së zhvilluar më 13 qershor janë dëmtuar rrethimi i kantierit dhe janë shkaktuar dëme materiale brenda pronës private. Gener 2 thotë se këto raste janë dokumentuar dhe janë referuar pranë organeve ligjzbatuese.
Kompania u ka bërë thirrje institucioneve përgjegjëse të marrin masat e nevojshme për të garantuar zhvillimin paqësor të protestës dhe për të parandaluar çdo akt dhune, vandalizmi apo hyrjeje të paautorizuar në kantier.
Në reagimin e saj, Gener 2 thekson se mbrojtja e pronës private, siguria e punonjësve dhe garantimi i një klime të sigurt për investimet janë detyrime të shtetit ligjor dhe në interes të të gjithë qytetarëve.
