Me këngën e bareshës që është ndarë nga stani, Elisa Spiropali ka zgjedhur kolonën zanore të një takimi të zhvilluar me një akademi politike me të rinjtë në Mal të Zi. Se çfarë u ka mësuar Elisa të rinjve në Podgoricë mbetet për t’u vlerësuar: si drejtohen doganat apo si drejtohet Kuvendi.
Megjithatë, ish-ministrja, që tashmë duket si baresha e lënë jashtë stanit të PS-së, shfaqej mjaft këndshëm, si në pamjen e kuruar, ashtu edhe në videomesazhin ku u dha të rinjve kurajë për të vijuar politikën, pasi sipas saj nuk ka parti politike që ecën përpara pa të rinjtë.
Pak a shumë si Elisa, e cila pas vitesh jargavitjesh për “Skënderbeun” e saj, ia doli të ngjitej në majat e pushtetit si shpërblim për servilizimin, pa mësuar kurrë se në politikë nuk je i suksesshëm nga mosha, por nga mentaliteti.
Dhe ndoshta paradoksi më i madh është se këngën e bareshës nuk e zgjodhi kur ishte ministre, por tani që nuk është më pjesë e stanit. Sepse është e lehtë të flasësh për rrugën tënde pasi e ke përfunduar udhëtimin; më e vështirë është t’u tregosh të rinjve se në politikë servilizmi mund të të ngjitë shumë lart, por nuk të garanton që do të qëndrosh gjithmonë atje.
