Qeveria shqiptare ka zyrtarizuar krijimin e një subjekti të ri publik, i cili do të ketë rol kyç në zhvillimin e projekteve të mëdha të investimeve strategjike, me fokus të veçantë projektin e resortit turistik në ishullin e Sazanit.
Shoqëria aksionare, e regjistruar me emrin “Albanian State Development & Real Estate” (ASDRE), është themeluar më 9 qershor 2025, ndërsa regjistrimi i saj në Qendrën Kombëtare të Biznesit ka përfunduar më 26 qershor 2025.
Sipas ekstraktit të regjistrit tregtar, ASDRE është krijuar për të garantuar një menaxhim efikas dhe transparent të pasurive të paluajtshme në pronësi të shtetit. Objektivat kryesore të kësaj ndërmarrjeje përfshijnë:
Përfaqësimi i shtetit: Subjekti do të shërbejë si përfaqësues i shtetit në partneritete dhe investime strategjike, veçanërisht lidhur me projektin e resortit në ishullin e Sazanit.
Zhvillimi i projekteve: ASDRE do të planifikojë dhe zbatojë projekte ndërtimore me standarde të larta të cilësisë dhe qëndrueshmërisë, duke u fokusuar në urbanistikë dhe teknologji të gjelbër.
Monitorimi i kontratave: Kompania do të mbikëqyrë kontratat e lidhura me palët e treta në kuadër të zhvillimit dhe administrimit të pasurive të paluajtshme për projektet e autorizuara.
Shoqëria është themeluar me një kapital prej 50,000,000 lekësh, ku aksionari i vetëm është shtetit përmes Korporatës së Investimeve Shqiptare (AIC).
Struktura drejtuese e kompanisë përbëhet nga:
Administratori: Julian Adili.
Këshilli Mbikëqyrës: Gert Hekurani (Kryetar), Gledis Shehu dhe Valentina Kazanxhi (Anëtarë).
Me krijimin e kësaj ndërmarrjeje, shteti synon të ketë një mekanizëm më të drejtpërdrejtë për të mbrojtur interesat e tij në projektet e mëdha të zhvillimit të turizmit që pritet të ndryshojnë profilin e zonave të mbrojtura dhe historike, siç është ishulli i Sazanit.
