Prej orës 07:00, qytetarët shqiptarë në gjithë vendin po votojnë për të zgjedhur Kuvendin e ri. Procesi po vijon në përgjithësi normalisht, me incidente nga ato që cilësohen “normale për zgjedhjet në Shqipëri.”
Votimi do të zgjasë deri në orën 19:00. Pas kësaj ore, do të mund të votojnë vetëm ata që janë në radhë pranë qendrës së votimit.
Deri në orën 12:00, KQZ raporton se pjesëmarrja në votim ishte 22.11%. Kanë raportuar 2546 nga 5225 qendra votimi në total. Krahasuar me vitin 2021, pjesëmarrja deri në orën 12:00 ka qenë 27.24%.
Një pjesëmarrje e tillë nuk duket favorizuese për partitë opozitare, pasi nga eksperienca e zgjedhjeve në Shqipëri, partitë që kërkojnë të sfidojnë qeverinë janë ato që angazhojnë mbështetësit e tyre për të votuar sa më herët. Megjithatë, duket ende shpejt për të bërë një parashikim për numrin e pjesëmarrjes, pasi ka ende kohë që shqiptarët të shprehin vullnetin e tyre për Parlamentin e ardhshëm.
