Drejtoria Vendore e Policisë Berat ka marrë të gjitha masat për garantimin e rendit dhe sigurisë gjatë procesit zgjedhor në të gjithë territorin e qarkut. Në funksion të përmbushjes së detyrave institucionale të parashikuara nga ligji, strukturat e policisë janë angazhuar maksimalisht për ruajtjen e qetësisë dhe mbarëvajtjen e procesit.
Për ruajtjen e 6 Komisioneve Zonale të Administrimit Zgjedhor (KZAZ) dhe 275 Qendrave të Votimit, janë angazhuar gjithsej 293 efektivë policie. Pas përfundimit të shpërndarjes së materialeve zgjedhore, punonjësit e policisë janë vendosur në terren, duke marrë në ruajtje objektet zgjedhore prej orës 18:00 të mbrëmjes së sotme.
Ruajtja fizike e këtyre objekteve do të vijojë deri në orët e para të mëngjesit të nesërm, kur do të nisin nga puna Komisionet e Qendrave të Votimit dhe ato Zonale të Administrimit Zgjedhor.
Sipas Policisë së Beratit, të gjitha detyrat e planifikuara janë realizuar në përputhje me procedurat standarde të sigurisë. Brenda strukturës është ngritur një grup drejtues dhe monitorues që ndjek në kohë reale situatën në terren dhe garanton komunikimin e shpejtë me median dhe publikun.
Në përditësimin më të fundit, policia bën me dije se situata e rendit dhe sigurisë paraqitet e qetë dhe pa probleme. Efektivët mbeten në gatishmëri të plotë për të garantuar një proces zgjedhor të qetë dhe të rregullt në të gjithë qarkun e Beratit.
