Pas një muaji fushatë, Shqipëria ndodhet sot në heshtje zgjedhore. Të dielën, më 11 maj, qytetarët do të votojnë për të zgjedhur 140 deputetët që do t’i përfaqësojnë në Kuvend për katër vitet e ardhshme.
Kodi Zgjedhor ndalon çdo aktivitet fushate gjatë kësaj periudhe, përfshirë mitingjet dhe shpërndarjen e materialeve propagandistike. Subjektet që e shkelin këtë rregull mund të gjobiten deri në 500 mijë lekë, ndërsa mediat deri në 2 milionë lekë.
Në këto zgjedhje të 11-ta të demokracisë, votojnë mbi 3.7 milionë shtetas, nga të cilët rreth 115 mijë janë votues për herë të parë. Kësaj radhe për herë të parë, voton edhe diaspora, përmes postës, proces që ka ngjallur debat për shkak të ankesave për parregullsi.
Në garë janë 2.046 kandidatë nga 11 subjekte politike, përfshirë koalicione dhe parti të njohura si Partia Socialiste dhe Partia Demokratike.
