Dy ditë para mbajtjes së zgjedhjeve parlamentare, Këshilli i Ministrave ka marrë një vendim të rëndësishëm, duke miratuar faljen e të gjitha gjobave të vendosura në periudhën 1 janar 2015 – 30 nëntor 2024. Vendimi prek një gamë të gjerë institucionesh publike, përfshirë Policinë e Shtetit, Policinë Bashkiake, Inspektoratet vendore të mbrojtjes së territorit, Inspektoratin Kombëtar të Mbrojtjes së Territorit, Autoritetin Kombëtar të Ushqimit dhe Inspektoratin Shtetëror Shëndetësor.
Gjobat që do të falen përfshijnë masat administrative ndaj qytetarëve për shkelje të masave kufizuese gjatë pandemisë së COVID-19, si dhe gjoba për ndërtime apo ndërhyrje pa leje për qëllime banimi apo bujqësie në zonat rurale. Po ashtu, nga falja përfitojnë edhe subjektet që ushtrojnë aktivitet bujqësor apo blegtoral.
Institucionet përkatëse janë të detyruara që brenda 30 ditëve të përgatisin listat e gjobave të paekzekutuara dhe t’i dorëzojnë ato pranë drejtorive vendore të taksave, me qëllim heqjen e tyre nga sistemi.
Sipas vendimit, çdo individ apo subjekt juridik që konstaton se një gjobë në këtë periudhë nuk është fshirë nga sistemi, ka të drejtë të paraqesë kërkesë pranë strukturave vendore përkatëse. Në rast refuzimi të kërkesës, palët kanë të drejtën e ankimit në gjykatë.
Ky vendim vjen në një moment politik delikat dhe ka gjasa të ngjallë diskutime mbi ndikimin e tij në elektorat.
