PD është kujtuar pak ditë para zgjedhjeve të kërkojë llogari për votën e emigrantëve. Jozefina Topalli i ka bërë thirrje KQZ-së që t’i kërkojë DHL-së të përmbushë detyrimet e saj ligjore dhe logjistike. “Thyerja e afateve dhe standardeve të vendosura në ligj është cenim i rëndë i votës së shqiptarëve që jetojnë jashtë kufijve të Shqipërisë. Në këtë mënyrë do të cenonte tërësisht integritetin e këtyre zgjedhjeve,” – tha zonja Topalli në një takim me gazetarët.
Ndërkohë, po sot, Partia Demokratike i kërkon SPAK-ut të nisë hetimet. Drejtuesi i Departamentit të Drejtësisë në Partinë Demokratike, Franc Nuri, deklaroi:
“Vetëm për qarkun Tiranë pati mbi 1 mijë raste të adresave të shënuara gabim në sistemin PER, dhe ndryshe dilnin kur dërgoheshin materialet nga DHL.
Në lidhje me rastin e Kretës, është krim zgjedhor. Publikisht disa individë të caktuar, që pretendojnë se janë përfaqësues të OJF-ve apo shoqatave të ndryshme, kanë dalë hapur në postime duke thënë se kanë pasur marrëveshje me DHL për të tërhequr dhjetëra zarfe. Pres që SPAK të ketë nisur hetimin; nëse nuk e bën, PD do të bëjë kallëzim sa më parë.
Nuk mundet që DHL të nënkontraktojë shërbimin dhe të mos zbatojë standardin që zarfi të dorëzohet personalisht kundrejt një ID-je. Kjo nuk ka ndodhur as në Itali, as Gjermani, e as në Britaninë e Madhe.”
Sipas kryetarit të KQZ-së, deri dje ishin 30 mijë zarfe të pashpërndara akoma tek shqiptarët jashtë vendit të regjistruar për të votuar në zgjedhjet parlamentare të 11 majit.
