Reagimet kundër projektit të ri të Reformës Administrativo-Territoriale po shtohen në disa bashki të vendit. Pas kundërshtimeve të shprehura në zona të ndryshme, edhe Rrogozhina dhe Belshi kanë dalë hapur kundër planit që parashikon ndryshime në hartën e pushtetit vendor.
Këshilli Bashkiak i Rrogozhinës miratoi një projektvendim me të cilin kundërshton shkrirjen e bashkisë dhe bashkimin e saj me Bashkinë e Kavajës. Projektvendimi u votua me mbështetjen e anëtarëve të Këshillit Bashkiak, të cilët, pavarësisht bindjeve politike, shprehën qëndrim të unifikuar kundër ndryshimeve të propozuara.
Para votimit, kryetarja e Këshillit Bashkiak të Rrogozhinës, Desi Gixhari, deklaroi se interesi i qytetarëve duhet të jetë mbi çdo ndarje politike.
“Nuk mund të pranohet një vendimmarrje që prek jetën e mijëra qytetarëve pa një proces transparent. Sot, pavarësisht bindjeve politike që kemi, na bashkon mbrojtja e interesit të qytetarëve të Bashkisë Rrogozhinë. Kur bëhet fjalë për interesin e qytetarëve, është inkurajuese që kemi gjetur gjuhën e përbashkët. Kur bëhet fjalë për të ardhmen e Rrogozhinës, interesi ynë qëndron mbi çdo bindje politike”, u shpreh Gixhari.
Ndërkohë, edhe në Belsh dhjetëra qytetarë dolën në protestë kundër projektit që parashikon bashkimin e Bashkisë Belsh me Bashkinë Elbasan. Të mbledhur në qendër të qytetit, protestuesit kërkuan që Belshi të ruajë statusin si bashki më vete, duke argumentuar se ndryshimet e propozuara cenojnë identitetin dhe përfaqësimin e komunitetit.
Me pankarta në duar, qytetarët shprehën kundërshtimin e tyre ndaj reformës. Një prej mesazheve që tërhoqi vëmendjen ishte: “Rilindja e donte Belshin kryeqytet, ju po e asimiloni”, duke reflektuar shqetësimin për humbjen e rolit administrativ të qytetit.
Protestuesit u bënë thirrje drejtuesve vendorë të mbrojnë interesat e komunitetit dhe të kundërshtojnë projektin, ndërsa theksuan se bashkimi me Elbasanin mund të ndikojë negativisht në përfaqësimin e qytetarëve, ofrimin e shërbimeve publike dhe zhvillimin ekonomik të zonës. Sipas tyre, çdo ndryshim në ndarjen territoriale duhet të paraprihet nga konsultime të gjera me banorët.
Protestat në Rrogozhinë dhe Belsh i shtohen reagimeve të shfaqura edhe në bashki të tjera të vendit kundër reformës së re administrativo-territoriale. Debati për riorganizimin e pushtetit vendor pritet të vijojë në ditët në vijim, ndërsa institucionet qendrore shqyrtojnë propozimet për hartën e re territoriale.
