Banorët e Dimalit i janë bashkuar protestave kundër ndryshimeve të propozuara në kuadër të Reformës Territoriale, e cila parashikon bashkimin e kësaj bashkie me Bashkinë e Beratit.
Qytetarët kanë kundërshtuar nismën e mazhorancës, duke argumentuar se shkrirja e Bashkisë Dimal do të ndikojë negativisht në ofrimin e shërbimeve vendore dhe do të largojë institucionet nga qytetarët.
Përveç protestës, banorët kanë firmosur edhe një peticion, përmes të cilit kërkojnë që Bashkia Dimal të vijojë të funksionojë si njësi më vete e qeverisjes vendore.
Sipas protestuesve, Dimal është një zonë me rëndësi të veçantë për shkak të zhvillimit bujqësor, shtrirjes territoriale, numrit të banorëve dhe vlerave historike që mbart. Ata argumentojnë se bashkimi me Beratin do të krijojë vështirësi për qytetarët, veçanërisht për fermerët e njësive administrative Kutalli, Cukalat dhe Poshnjë, të cilët do të duhet të përballen me distanca dhe procedura më të vështira administrative.
“Është qyteti ku duam të rrisim fëmijët tanë”, janë shprehur banorët, duke kërkuar që Bashkia Dimal të mos përfshihet në procesin e riorganizimit territorial.
