Qytetarët e Poliçanit dolën mbrëmjen e së enjtes në protestë kundër Reformës Territoriale, duke kundërshtuar mundësinë që bashkia e tyre të preket nga riorganizimi i ri administrativ, i cili po diskutohet në vend.
Me pankarta në duar, banorët u mblodhën në sheshin përpara kinemasë së qytetit, duke kërkuar që Poliçani të vijojë të mbetet bashki më vete.
“Poliçani nuk preket”, “Mos na vrisni të ardhmen”, “Harram i paçi votat e Poliçanit” dhe “Deputetë dele, mos e votoni reformën”, ishin disa nga mesazhet që mbanin protestuesit.
Banorët u shprehën se çdo ndryshim i statusit administrativ të Poliçanit do të ndikonte negativisht në zhvillimin e qytetit dhe në të ardhmen e komunitetit, ndaj kërkuan që qeveria të heqë dorë nga çdo plan që prek bashkinë.
Gjatë tubimit u firmos edhe një peticion, përmes të cilit qytetarët kërkojnë që Bashkia e Poliçanit të mos përfshihet në ndryshimet e parashikuara nga Reforma Territoriale.
