Eric Wendt, kandidati i nominuar për ambasador të Shteteve të Bashkuara në Shqipëri, ka marrë një votë pozitive në Senatin amerikan, duke kaluar një nga etapat procedurale drejt konfirmimit të tij në këtë detyrë.
Senati ka miratuar një rezolutë procedurale që lejon shqyrtimin dhe votimin në bllok të 74 emërimeve të administratës amerikane në Kalendarin Ekzekutiv, ku përfshihet edhe kandidatura e Wendt për postin e ambasadorit në Tiranë.
Rezoluta u miratua të enjten, më 30 korrik, me 50 vota pro dhe 47 kundër, sipas linjave partiake. Megjithatë, përfshirja e emrit të Wendt në këtë listë nuk nënkupton ende konfirmimin përfundimtar si ambasador, por i hap rrugën shqyrtimit dhe votimit të kandidaturës së tij nga Senati.
Nëse miratohet, Eric Wendt do të jetë ambasadori i parë amerikan në Shqipëri pas largimit të Yuri Kim në qershor të vitit 2023. Që prej asaj kohe, Ambasada e SHBA-së në Tiranë është drejtuar nga të ngarkuar me punë, ndërsa përpjekjet për emërimin e një ambasadori të ri nuk u finalizuan.
Kandidatura e Wendt shihet si një sinjal për një angazhim të mëtejshëm të Uashingtonit në marrëdhëniet me Shqipërinë, për shkak të profilit të tij të lartë ushtarak dhe përvojës në strukturat e NATO-s.
