Nga dyert e SPAK, Monika Kryemadhi deklaroi se është përfshirë në fushatën zgjedhore të 11 majit dhe kërkon vota për ish-bashkëshortin e saj, Ilir Meta, që garon nga burgu në listën e hapur të Partisë Demokratikë.
“Jam përfshirë në fushatë, për babain e fëmijëve të mi. Fëmijët janë me mua në çdo hap, në çdo takim. I kam marrë si dëshmitarë duke patur parasysh stafi i ngushtë i z.Meta me paturpësinë më të madhe thonë: “mos dëgjoni Monikën se kërkon vota për PS”. Kur në të vërtetë, paaftësia e tyre për të shkuar derë më derë tek njerëzit për të kërkuar vota, është një justifikim i tillë. Prandaj dhe nëpërmjet jush iu bëj thirrje të gjithë anëtarëve të PL-së, miqve të Ilir Metës, Monika Kryemadhit, kudo që janë të votojnë Ilir Metën. Vota të shkojë si votë morale. Se çfarë thonë zyrtarët apo mercenarët që kanë uzupruar apo izoluar drejtimin e PL-së, t’i harrojnë dhe vetëm ecin përpara”, deklaroi deputetja e Partisë së Lirisë.
E pyetur se kush janë mercenarët, Kryemadhi u përgjigj: “Rrogtarët. Mjafton të hyni dhe shikoni kush ka bordero të Partia e Lirisë, bordero që ne se kemi patur kurrë. Ata janë mercenarët”.
Sipas Kryemadhit, vendimi i ish-presidentit Ilir Meta për të garuar në listë të hapur tregon kthjelltësi politike nga ana e tij dhe do të çojë sa më shumë vota në kutitë e votimit të opozitës.
Deputetja e Partisë së Lirisë, sulmoi dhe ish-ambasadoren amerikane në Tiranë, Yuri Kim, teksa theksoi se Ilir Meta u rrëmbye me urdhër të saj. “Këtu i burgosin njerëzit vetëm se janë në hetime dhe më pas bëjnë gjëra të tjera për t’i larguar nga politika. Rrëmbimi i Ilir Metës është bërë me urdhër të të një gruaje që nuk është askushi, me urdhër të Yuri Kim, e cila i premtoi parajsën mbi tokë institucionit të drejtësisë. Dhe Edi Ramës i dha një mundësi për të treguar se hakmarrjen e tij personale e kryen në mënyrë perfekte mbi sistemin e drejtësisë”.
Monika Kryemadhi komentoi dhe divorcin nga Ilir Meta pas gati 3 dekadash martesë. “Vazhdoj dhe them se kush e ka iniciuar divorcin le ta komandojë. Nuk ka pse të marr pjesë në seancë pajtimi kur dikush do ndërprerjen e marrëdhënieve me mua”, tha Kryemadhi, duke sqaruar se politika nuk është shkaku i ndarjes, sikurse pretendoi Meta në kërkesë-padinë dorëzuar në gjykatë.
“Ajo që s’të vret të bën më të fortë. Për të fituar gjithçka duhet të lëshosh gjithçka. Duke lëshuar çdo gjë nga e kaluara mund të fillosh diçka të re”, tha Kryemadhi, teksa foli për jetën pas divorcit.
Monika Kryemadhi dhe ish-presidenti Ilir Meta po hetohen nga SPAK për akuzat e korrupsionit, pastrimit të parave dhe fshehjes së pasurisë.
