Kryetari i Partisë Demokratike, Sali Berisha, gjatë prezantimit të kandidatëve për deputetë në qarkun e Durrësit, iu përgjigj sulmeve të kryeministrit ndaj strategut të fushatës së tij, La Civita. Berisha tha se Rama ka dy ditë që nuk fle, por i vendos nofka, siç e quan ai gjigantit, gjeniut, bashkëgjeniut të rikthimit më të madh në histori të Berishës.
“Edi Rama, je i pashpresë. E di ti se e bitise siç e meriton. Ka dy ditë dhe net që nuk fle dhe merret duke i vënë nofka të ndryshme gjigantit, gjeniut, bashkëgjeniut të rikthimit më të madh në histori, Chris LaCivitas. Arkitektit të rikthimit të Sali Berishës dhe opozitës shqiptare në pushtet” – tha Berisha.
Madje, kreu i PD njoftoi se departamenti i kreativitetit në fushatën e PD mbështetet nga Walt Disney, (kompania e famshme që prodhon filma të animuar kryesisht për fëmijë). Sipas tij, mbështetja e saj do të bëjë pluhur mashtrimet e Ramës.
“Edi, prit se do marrësh vesh prapë se kush përfaqëson tani anën kreative. Kur të marrësh vesh se Wolt Disney është në mbështetjen tuaj, bëhen pluhur të gjitha mashtrimet e tij” – u shpreh Berisha.
Kryedemokrati më tej u bëri thirrje edhe krerëve të bandave në Durrës të mos kërcënojnë qytetarët dhe të mos prekin votën, pasi do të ketë dënime të rënda për ta.
“I them Visit të Pojës, Suel Çelës, Shytëve, për çdo votë do të keni 1 vit më shumë dënim, mos prekni votën e shqiptarëve. Ushtarë të të keqes së Edi Ramës guxoni dhe kërcënoni qytetarët. Këtu në Durrës, Gjushi me fustan dhe Poja çdo natë mblidhen si hiena për të bërë plane për të vjedhur votat e qytetarëve të Durrësit. Nuk do të ketë dënime më të rënda Shqipëri se për vjedhjen e votave”, tha Berisha.
