Sali Berisha nisi fjalën me diasporën në Brescia për fushatën elektorale të 11 majit, me superlativa për shqiptarët atje si shembuj suksesi dhe sakrifice.
“Nëse ka një forcë politike në Shqipëri që mishëron këto trajta shqiptare është PD. Kaluam një opozitë të gjatë, proces rithemelimi të vështirë. U luftuam 3 vite me radhë për të zhdukur Shqipërinë me opozitë. Ashtu si ju që fitoni çdo sfidë dhe ne kaluam çdo pengesë. U ringritëm nga hiri për një mision të shenjtë. Mbrojtëm interesin kombëtar. Do shpëtojmë Shqipërinë nga diktatura e Edi Ramës”, tha Berisha.
Ai falënderoi miqtë italianë dhe udhëheqësit e Forza Italia që sipas tij, qëndruan me PD dhe vijuan traditën e Silvio Berlusconit, të cilin e quajti mikun më të madh të shqiptarëve.
“Vij këtu te ju me tre lajme shumë të mira nga kjo javë, fasada ra!” – u shpreh Berisha, duke përmendur pritjen e tij në Asamblenë Parlamentare të Këshillit të Evropës, ku foli për “narkodiktaturën e Edi Ramës”, arrestimet politike, licencimin e kanabisit dhe lidhjet me krimin e organizuar.
Ai tha se në këtë vizitë mësoi se kreut të narkoshtetit i ishte anuluar darka zyrtare në Këshillin e Evropës për shkak të sjelljes së tij, duke e krahasuar atë me “birin e Gedafit”.
“U zhvilluan dëgjesa për zgjedhjet e 11 majit, parlamentarët evropian denoncuan dhunimin e zgjedhjeve të shkuara, dhunën ndaj opozitës, shkrirjen e pushtetit me krimin”, tha Berisha, duke shtuar se “Evropa i ka sytë e tëra te 11 maji, te vota juaj, fitorja juaj, fitorja e Shqipërisë”.
Lajmi tjetër, sipas tij, ishte çelja e fushatës elektorale. “Në fakt, ajo çelje fantastike, madhështore e pa parë në 32 vite, i ka rrënjët në zemrat tuaja”, tha ai.
Berisha përmendi dhe ardhjen e La Civitës në shkurt, duke thënë: “Të nesërmen Edi Rama i ra tavolinës me grusht, sa nuk i ra me kokë. Tani e sheh vetën të humbur, dhe gënjen veten me gënjeshtrat që beson”.
