Sali Berisha e krahasoi veten sot me iPhone, ndërsa Ramën me telefonin Nokia, në prezantimin e programit të PD-së. Kryetari i saj shpalli disa prioritete, duke e vendosur familjen shqiptare në qendër si faktor themelor të dinjitetit dhe solidaritetit njerëzor të shqiptarëve.
Sipas Berishës, familja shqiptare vitet e fundit ka përjetuar një agresion të egër nga George Soros. Ai pretendoi se në kopshtet dhe shkollat shqiptare fëmijëve po u mësohej që t’u drejtoheshin prindërve jo më si nënë dhe baba. “Për ne, familja është sa hyjnore dhe tokësore,” tha Berisha, duke premtuar se do të bëjë gjithçka për solidaritetin, rimëkëmbjen dhe mirëqenien e familjes.
Në qeverinë e ardhshme, PD do të krijojë Ministrinë e Familjes, e cila do të aplikojë politikat më të avancuara për familjen shqiptare. “Fëmija i tretë do të mbështetet nga lindja deri në 23 vjeç për çdo gjë,” tha kryetari i PD-së, duke garantuar gjithashtu se qeveria e ardhshme do të ndihmojë nënat kryefamiljare për të lehtësuar çdo mungesë.
“Ne zotohemi se do të luftojmë së bashku me murin e patriarkatit. I garantojmë gratë dhe vajzat se do të bëjmë gjithçka për t’i mbështetur, përfshirë dhe shpërblimin për gratë shtëpiake,” premtoi Berisha, një premtim që bie në kontrast me programin konservator që PD pretendon se ka adaptuar.
Berisha theksoi gjithashtu se në programin e PD-së do të ketë një vend të veçantë për rininë shqiptare. “Shqipërinë madhështore do ta bëjnë të rinjtë,” tha ai, duke përmbyllur aktivitetin e prezantimit të programit të PD-së.
