Duket se organizatorët e PS dhe PD kanë harruar një rregull të thjeshtë: “Teknika nuk të fal.” Në nisjen e fushatave elektorale, problemet teknike duket se i kanë bërë partitë të duken më shumë si debutues të pasigurt në një talent show sesa si forca kryesore politike të vendit.
Në eventin e PS, ideja ishte e thjeshtë dhe ambicioze: drejtuesit e qarqeve do të lidhnin live për të prezantuar gratë në lista. Por në qarkun e Lezhës, plani “u fik” bashkë me zërin e Ulsi Manjës, i cili fliste energjikisht ndërkohë që publiku dëgjonte vetëm… heshtjen. Teknikët vrapuan të rregullonin situatën, por gabimet teknike e sosën durimin e Ramës, i cili e shkurtoi ceremoninë duke kaluar direkt te fjalimi i tij.
Nga ana tjetër, PD pati një moment “kryqëzimi mes politikës dhe diskotekës.” Ndërsa përfaqësuesit mbanin fjalime, fonia vendosi t’i vendosë përsipër këngën e filmit Rocky Balboa që nuk ndalonte. Qytetaët në shesh mbetën në dilemë: të dëgjonin fjalimin apo të kërcenin? Ishte një konkurrencë e pabarabartë, dhe kënga duket se fitoi në disa raste. Bashkë me thirrjen “o Sali o hero gjithë Shqipëria ty të do”.
Ndonëse këto situata mund të duken qesharake, ato lënë një shije të hidhur tek mbështetësit e partive. Për dy forca politike që pretendojnë seriozitet dhe përgatitje maksimale, këto defekte janë si një lloj testimi për fushatën që sapo ka trokitur. Mos ndoshta është koha që në listat e kandidatëve të fusin ndonjë teknik zëri?
