Partia Demokratike çeli sot fushatën zgjedhore me një takim në sheshin “Nënë Tereza”. Ndryshe nga ç’pritej, i vetmi ndryshim nga takimet e deritanishme të Berishës, ishte rikthimi i La Civita në Shqipëri i cili mbajti një fjalim të shkurtër. Strategu amerikan tha se socialistët do të dështojnë siç dështuan edhe ata në SHBA, ndërsa përdori retorikën e kreut të PD ku tha se të majtët duan të fusin në burg të gjithë opozitën.
"Votoni për Berishën, jepini vendit shpresë dhe mundësi! Socialistët do dështojnë, siç dështuan edhe me Trump! Ta bëjmë Shqipërinë madhështore. Kush është gati ta bëjë Shqipërinë madhështore sërish? Në vitin 2024, në Shtetet e Bashkuara, socialistët u përpoqën të fusnin në burg Donald Trump. Donald Trump nuk u dorëzua. Ata dështuan. Në vitin 2025, këtu në Shqipëri, socialistët duan të fusin në burg të gjithë opozitën e tyre” - tha ndër të tjera LaCivita.
Pas tij fjalën e mori Sali Berisha, që ndër të tjera paralajmëroi kryeministrin Edi Rama të mos prek votën, përndryshe vend në tokë nuk do të ketë, ndërsa i bëri thirrje që të largohet me votë.
“I them Edi Ramës, mos prek votën se në mënyrë absolute mbi tokë vend nuk do të kesh. Jo! Largohu me votë se i ke bërë të këqija të mëdha këtij vendi. Po ikën me turp se keqja më e madhe e këtij kombi, pas Enver Hoxhës” – tha Berisha.
Kryedemokrati pati dhe një përgjigje për Ramën lidhur me moshën, ku tha se “për sa i përket moshës, ju garantoj që ay ngjet jo me Gramozin por me gjyshin e Gramoz Ruçit”.
Berisha gjithashtu tha se me vettingun që Rama i bëri, i tregoi shqiptarëve se Berisha është politikani më i pastër që kanë njohur shqiptarët.
