Partia Socialiste hapi zyrtarisht fushatën elektorale ditën e sotme me një aktivitet në sheshin “Skënderbej”, ku nuk munguan këngët, vallet dhe polifonitë që i paraprinin daljeve në skenë të kandidatëve të çdo qarku. Në fund ishte radha e kryeministrit Edi Rama, i cili edhe ai kishte këngën e vet që ia kishte pëgatitur miku i ngusht i kryebashkiakut Erion Veliajt, reperi Noizy.
Në fjalimin që zgjati disa minuta me theks te premtimi i tij në këtë fushatë, anëtarësimi në BE, Rama nuk kurseu patriotizmin e madh duke thënë se shqiptarët e kanë dashur perëndimin që në kohën e Arbërve. Madje kryeministri shkoi më tej ku cilësoi Gjergj Kastriotin si profetin e shqiptarëve dhe që e ka lënë amanet për t’u bërë një me fatin e Europës.
“Arbërit ishin i vetmi popull autokton në Europë. 1308 murgj që u shënuan si anonimë, shkruan se ky popull mezi pret të idealizohet me perëndimorët, kurdo që i shtrohet dora e besimit dhe ligjit. Për të katërtën herë, profeti ynë Gjergji i bën Europës, se çmimin se ca familje i takon arbënorit i cakton vetë, dhe si një fanatik i vendosur të jetë gur i rëndë në vendin e vet. Së bashku me ju në një marshim të fundit drejt tokës së premtuar të Europës, profetit tonë kombëtar, për t’u bërë një me fatin Europian që ai atje mbi kalë na e përcaktoi si tonin që më pas rilindasit tanë, heronjtë e pavarësisë dhe të gjitha luftrave të mendimit patriotik shqiptar, na e konfirmuan si amanet” – tha ai.
Duke qenë se buxheti i shtetit në 12 vite është zbrazur jo pak nga korrupsioni, Rama foli për të mirat që do të sjell BE. “Kur shqipëria të ulet në atë sofër, do të marrë të njëjtën shumë 1 miliard e ca euro, por ama çdo vit” – tha ai.
Ndonëse shumë prej bashkëpunëtorëve i ka të arrestuar nga SPAK, kryeministri u shpreh sërish se PS është garancia e vetme për drejtësinë. “Qysh nga 1912 dhe deri pak vite më parë nuk ka pasur asnjëherë në asnjë individ të veshur me pushtet politik që të jetë hetuar apo gjykuar nga prokurorë apo gjykatës të pavarur prej qeverisë” – u shpreh Rama.
